Обрежувањето или циркумцизијата е една од најчестите хируршки интервенции кај машките деца, но околу неа и понатаму постојат бројни дилеми, стравови и погрешни совети. Кога е вистинското време за интервенција, дали секоја фимоза е проблем и што родителите никако не треба да прават? На овие прашања во емисијата „Медицинско катче“ одговори д-р Златко Алексовски, детски хирург од приватната болница „Аџибадем Систина“.

Докторот објаснува дека циркумцизијата претставува хируршко отстранување на препуциумот – кожичката на пенисот, со што се овозможува целосно оголување на глансот.

– Станува збор за рутинска и кратка процедура која трае околу 15 до 20 минути, а заедно со анестезијата вкупно околу 30 до 40 минути. Кај нас интервенцијата се изведува со анестезија за детето да не чувствува болка и да нема трауми – објасни д-р Алексовски.

Според него, кога станува збор за религиозно или културолошко обрежување, идеалниот период е околу првата година од животот. Но, кога интервенцијата е медицински индицирана, најчесто проблемот станува видлив по третата година.

Докторот предупредува дека многу родители уште од раѓање се советуваат насилно да ја повлекуваат кожичката кај бебињата, што според него е целосно погрешно.

– До тригодишна возраст физиолошката фимоза е нормална појава. Нема потреба од насилно отворање на кожичката ниту од посебни манипулации. Тоа може да предизвика микроповреди и подоцна создавање вистинска фимоза – вели тој.

Наместо агресивни обиди за „отворање“, советот е само редовна и нормална хигиена.

– Најдобар третман е вода и сапун. Нема потреба од специјални влажни марамчиња, особено оние што содржат алкохол или дезинфекциски средства – додава хирургот.

Медицинска потреба за циркумцизија постои кога кожичката не може да се повлече поради создаден фиброзен прстен, што предизвикува болка, инфекции и проблеми во нормалното функционирање.

– Таквата состојба најчесто се дијагностицира по третата година. Детето може да има инфекции, болки, печење или потешкотии при мокрење. Тогаш циркумцизијата станува медицински оправдана – објаснува Алексовски.

Тој посочува дека кај возрасните пациенти интервенцијата речиси секогаш е последица на сериозен медицински проблем.

– Кај возрасните најчесто станува збор за лузнести промени, инфекции, микротрауми или сексуално преносливи болести кои доведуваат до стеснување на кожичката – вели докторот.

Според д-р Алексовски, циркумцизијата денес најчесто се изведува како еднодневна хирургија. Детето се прима во болница во утринските часови, се подготвува за интервенцијата, а по операцијата останува под надзор само неколку часа.

– По будењето од анестезија детето се следи два до три часа и потоа си оди дома. Обично се прават уште една до две контроли и закрепнувањето оди брзо – објаснува тој.

Постоперативниот период најчесто поминува лесно.

– Болките се минимални, ретко има потреба од аналгетици. Најважна е хигиената. Веќе по три до пет дена децата функционираат сосема нормално – додава хирургот.

Иако интервенцијата се смета за безбедна, докторот потенцира дека како и кај секоја операција, постојат можни компликации.

– Може да се јави локална инфекција или минимално крвавење, но тоа се случува ретко и најчесто поминува без посериозни последици – вели тој.

Религиозните интервенции се стандардни, но расте бројот на оние што се прават без медицинска потреба – истакна Алексовски.

Тој додава дека кај тинејџерите и понатаму постои стигма и срам да се зборува за проблемите.

– Многу деца кријат дека имаат проблем сè додека состојбата не стане сериозна и не бара хируршка интервенција – предупредува докторот.

На крајот од разговорот, д-р Алексовски апелира родителите да не паничат и да не применуваат агресивни методи кај малите деца.

– Ова е рутинска интервенција која се изведува со години и е безбедна кога е правилно индицирана. Најважно е родителите да не прават насилно повлекување на кожичката и навреме да се консултираат со педијатар или детски хирург ако забележат проблем – порача тој.