Последниот петок од ноември е резервиран за сите шопинг-зависници! „Блек фрајдеј“ е ден кој асоцира на шопинг и излози исполнети со најави за огромни попусти.

„Слободен печат“ ги праша граѓаните дали купуваат за „Блек фрајдеј“, што најчесто купуваат, дали сметаат дека попустите се реални и дали забележале измами во цените?

Според одговорите, голем дел од анкетираните не веруваат во попустите кои се наменети токму за овој ден.

– Не купувам од Македонија за „Блек фрајдеј“ затоа што не се реални попустите – вели една девојка.

Интересно е тоа што купувачите успеале да „ги фатат во лага“ брендовите кои продаваат производи по намалени цени.

– Во последниве години не купувам, но порано буквално сум одлепувала цени за да се уверам дека се навистина намалени – додаде таа.

Ги прашавме граѓаните и колку се финансиски одговорни, односно дали досега купиле некој производ само поради тоа што е на попуст, а не им треба, на што тие одговорија:

– Купувам секогаш она што ми треба, а водам сметка за цената да не е превисока – изјави еден господин.

– Да, секако дека сум купила – изјави една од анкетираните.