Жители на скопските села во општината Чучер Сандево објавија снимки на кои се гледа како на ридовите околу селото Горњани во шумата се запалени гуми, што за нив е директен доказ дека пожарите кои им се закануваа на нивните куќи во изминатите два дена – се подметнати.

Претходно денеска и директорот на Дирекцијата за заштита и спасување, Стојанче Ангелов, објави дека во појасите во кои пожарникарите и локалните жители се бореа со пожарите, пронајдени се палети полеани со бензин и запалени.

Жителите на селата од областа, кои со натчовечки напори вчера успеаја да ги одбранат куќите од огнената стихија, организираат ноќни стражи за да спречат подметнување нови пожари.

Во пожарите кои од неколку страни ги зафатија областите околу селата во општина Чучер Сандево во изминатите 36 часа, изгореа неколку куќи, како и ниви со жито и различни насади и неколку помошни објекти.