Конкурсот беше интернационален. Со колешките се заознавме преку мастерс студиите за урбана архитектура и зелени градови и бидејќи сите имаме различна позадина, решивме да се пријавиме и да понудиме иновативно решение, а со самото тоа да го искористиме знаењето стекнато од Универзитетот во Франција. Самиот натпревар е поделен на три локации – ние ја одбравме локацијата во Париз, бидејќи нашата идеја беше да понудиме диверзификација на видови на растенија, бидејќи самата населба е со голем етнички диверзитет, па сакавме преку иновативни решенија да понудиме носење на нивната култура и исхрана во самиот центар на Париз, изјави во „Утрински брифинг“ Михаела Василевска, архитект.

– Самиот натпревар беше со цел да се промовира ваквиот начин на развивање на урбаната агрикултура во центарот на градовите и беше позитивно прифатено. Функцијата на вертикалните градини е да се надомести хоризонталниот простор и мислам дека одлично би било тоа да се направи и во Скопје. Позитивната страна кај вертикалното градинарство е што не се користи земја. Постои техника каде што со контролирано користење на вода и хранливи материја се опрашуваат растенијата. Со тоа статиката не бара големи промени – вели Василевска.