Фудбалерите на Торино денеска ја совладаа Парма со 4:1, во воведниот натпревар од 29 коло од најсилното италијанско првенство.

Важната победа на „биковите“ дојде по двата автогола на гостите во второто полувреме. Торино поведе во третата минута преку Симеоне, пред Пелегрино да го израмни резултатот во 20 минута.

Клучниот период беше почетокот на второто полувреме. Прво, Делпрато ја погоди сопствената мрежа во 55 минута, а Кеита го стори истото во 57 минута.

Запата стави точка на натпреварот во првата минута од судиското продолжение, а Парма го претрпе првиот пораз по пет натпревари, во кои трипати победи и двапати ремизираше.

Торино е на 13 позиција на табелата со 33 бода, едно место под Парма, која има досега 34 бода.