Непознат сторител, кој е снимен, рано утрото во неделата дошол пред Градската куќа во Нови Сад и потпалил новогодишна декорација на вовче, откако претходно ја полеал со бензин, јавија српските медиуми.

Чинот предизвика шок и згрозеност кај многу Срби, ако се суди според коментарите на социјалните мрежи.

На снимката се гледа како потпалувачот, кој дошол со велосипед, го полева вовчето со бензин и фрла запалено чкорче од кибрит, но отпрвин не успева да го запали. Во вториот обид тој успешно го пали огнот, а локомотивата на декоративното вовче брзо пламнува, додека „српскиот Гринч“, како што го нарекоа на мрежите, бега од местото.

Пожарот го изгаснале неколкумина минувачи, уште пред да дојдат пожарникарите.

Полицијата соопшти дека трага по непознатиот пироман.