ВИДЕО: Спомен куќата на Мајка Тереза најпосетувана туристичка атракција во Македонија

Аријан Асланај директор на спомен соба на Мајка Тереза

Спомен куќата на „Мајка Тереза“ е најпосетуваниот објект во Македонија, дневно ја посетуваат околу 500 туристи, а годишно околу сто илјади туристи од странство. За жал, помеѓу посетителите најмалку се застапени домашните туристи, рече денеска во Утрински брифинг директорот Аријан Асланај.

– За да се посети спомен куќата на Мајка Тереза не е потребна претходна најава, доколку се работи за домашни туристи. Кога станува збор за групни посети на странски туристи неопходно е претходно да се најават. Влезот е слободен, што значи не наплатуваме билет. За прошетката низ спомен куќата се грижат кустоси кои со посетителите ја споделуваат животната приказна на Мајка Тереза. Тоа е многу повеќе од она што граѓаните веќе го знаат за светицата. Сликите се хронолошки поставени од нејзиното раѓање се до прогласувањто за светица. Таа пред да замине во Калкута заминала во Даблин, Ирска, каде се приклучува кон Лорето сестринството. Потоа со дозвола на Ватикан создава сопствена мисија и заминува за Бенгали, а дури потоа оди во Калкута, вели Асланај.

Поставката најмногу се состои од фотографии од животот на Мајка Тереза и документи, кои не се оригинали, а изложена е и макета на куќата во која живеела Мајка Тереза.

– Тука имаме единствено само една покривка за глава, односно сари, која оригинално и припаѓала на Мајка Тереза. Имаме скенирана фотокопија од Нобеловата награда за мир. Оригиналните документи поради безбедност е подобро да бидат во сопственост на Државниот архив, објаснува директорот на Спомен куќата.

На местото на кое е изградена спомен куќата порано имало изградено црква. И денеска над галеријата има мала капела каде и денеска се одржуваат миси.

Мисијата на Мајка Тереза се` уште продолжува. Околу 5.000 милосрдни сестри во светот го продолжуваат патот на хуманоста. Неколку од нив хуманоста ја шират и во Скопје.

– Во скопската населба Кисела Вода се наоѓа куќата во која неколку хуманитарки ја шират мисијата на Мајка Тереза. Таму делат оброци, а и згрижуваат деца од проблематични семејства и семејства во социјален ризик. Ниту една од нив не е од Македонија, дојдени се специјално за да шират хуманост, вели Аријан.

Тој вели дека многу малку од странските посетители знаат дека Мајка Тереза е родена во Македонија, речиси сите мислат дека е родена во Индија.

Викендов во заедничка организација со здружението „Скопјанката Мајка Тереза“ беа доделени посланија за хуманост и статуетки со ликот на Мајка Тереза на заслужни граѓани. Изборот беше ставен на медицинските лица кои дадоа голем придонес во борбата против пандемијата.

Видео на денот