Секоја цигара што се продава во Канада ќе мора да доаѓа со индивидуално здравствено предупредување дека „цигарите предизвикуваат импотенција“ и рак и дека има „отров во секое вдишување“, според новите правила кои стапија на сила во вторникот, пренесува „Саенс алерт“(Sciencealert).

Новите регулативи, кои беа објавени во мај, се први вакви во светот.

Цигарите со поголема димензија со новите индивидуални етикети се очекува да бидат достапни во продавниците во рок од една година, а потоа и цигарите со редовна големина на почетокот на 2025 година.

„Предупредувачките етикети ќе бидат практично неизбежни и заедно со ажурираните графички слики прикажани на пакувањето, ќе обезбедат вистински потсетник за здравствените последици од пушењето“, изјави поранешната министерка за зависности на Канада, Каролин Бенет.

Канадската влада забележа дека некои млади луѓе, кои се особено подложни на ризикот од зависност од тутун, почнуваат да пушат откако ќе им дадат една цигара наместо пакување, на кое се означени здравствените предупредувања.

Во 2000 година, Канада стана првата земја што нарача графички предупредувања на кутиите цигари – вклучувајќи слики од заболени срца и бели дробови – за да ја подигне свеста за здравствените опасности поврзани со употребата на тутун.

Пушењето е во тренд на намалување во последните две децении.

Но, според владините податоци, употребата на тутун продолжува да убива 48.000 Канаѓани секоја година, а речиси половина од трошоците за здравствена заштита во земјата се поврзани со употребата на супстанции.

Отава има за цел дополнително да го намали бројот на пушачи во земјата на пет отсто од населението, или околу 2 милиони луѓе, до 2035 година – од околу 13 отсто пушачи во моментов.