Куќа се запали утрово во центарот на Призрен. За жал, во пожарот животот го загуби дете на возраст од околу 1 година. Веста ја потврди портпаролот на полицијата за регионот на Призрен, Шаќир Битиќи, пренесува Еуроњуз на албански јазик.

Тој рече дека детето починало како резултат на вдишување чад. Додаде и дека уште три деца добиле медицинска помош.

„Денес, на 30.12.2025 година, околу 10:00 часот, беше пријавен пожар во станбена куќа во центарот на Призрен. Како последица на пожарот, животот го загуби дете на возраст од околу 1 година, при што се сомнева дека смртта настапила како резултат на вдишување чад. Три други деца се спасени и испратени на медицинска помош во Ургентниот центар, каде што ја добиваат потребната здравствена заштита“, рече тој.

Битиќи додаде дека пожарот е речиси целосно локализиран, додека причините ќе ги испитаат надлежните органи.

„Екипите за итни случаи реагираа веднаш и пожарот е речиси целосно локализиран. Надлежните екипи продолжуваат да бидат на местото на настанот. Причините за пожарот ги истражуваат надлежните органи и ќе бидат потврдени по завршувањето на истражните постапки“, додаде тој.