Легендарниот рок-музичар Били Ајдол ја прими наградата за животно дело на 52-рото доделување на Американските музички награди во Лас Вегас, а по тој повод одржа емотивен говор со кој ги охрабри младите луѓе што сакаат да се развиваат во музиката, пишува „Ултимејт метал“.

Наградата му ја врачи Леон Томас, кој зборуваше за тоа како неговиот однос кон музиката произлегол од учеството на неговите родители во организацијата „Блек рок коалиција“, насочена кон промоција на рок-музичари.

@amas We ❤️ you @billyidol! Congratulations again on your Lifetime Achievement Award! The show is almost over ➡️ tune in NOW on @cbs and @paramountplus ♬ original sound – AMAs

„Ти благодарам, Леон. Се сеќавам на ‘Блек рок коалиција’. Навистина направија многу за многу луѓе. Им благодарам на ‘Американските музички награди’ за ова признание. Им благодарам на сите обожаватели. Успеав да го живеам својот сон и сето тоа е благодарение на вас. Кога почнав да свирам панк-рок далечната 1976 година, мислевме дека тоа ќе трае само шест месеци, а не 50 години. Го правевме тоа од љубов и затоа што музиката беше единственото нешто што ни даваше чувство на слобода и ослободување“, изјави Ајдол.

Тој додаде дека верувале во тоа што го прават и мислеле дека ако само сонуваат за таков живот, тој ќе им возврати во изобилство.

@amas The original IDOL never disappoints ✨ Thanks for the good times, Billy Idol. #AMAs Stream the show on @paramountplus ♬ original sound – AMAs

„Токму тоа и се случи. На секое дете што го сака рокенролот или кој било вид музика исто колку што јас и Леон ја сакаме, и ако сте инспирирани да го создадете тоа чувство на слобода и да го следите уметничкиот живот, сѐ што можам да ви кажам е да изберете инструмент. Откријте кои сте и бидете тоа. Ви благодарам за рокенролот“, порача тој.

За да го одбележи признанието, Ајдол изведе и дел од своите најголеми хитови. Воедно, тоа беше негов прв настап на доделувањето на Американските музички награди.

Во настапот беа вклучени песните „Очи без лице“ и „Танцувај со мене“.

„Били Ајдол е рок-легенда чие влијание ги надминува генерациите и жанровите. Тој остави неизбришлива трага во популарната култура и музичката индустрија. Воодушевени сме што можеме да му ја доделиме оваа награда“, порачаа организаторите на манифестацијата.