Македонскиот рапер Христијан Тасковски – Таско изненади многумина со својата последна објава во која вели дека се повлекува од музичката сцена и социјалните мрежи. Како што објасни во видеопораката, овој чекор го прави со цел „да си ја врати внатрешната рамнотежа, мирот и благосостојбата на умот“.

Во видеото споделено на неговите профили, Таско накратко порача дека во наредниот период ќе направи пауза од создавање и јавни настапи, додавајќи дека чувствува потреба да се посвети на себе.

„Сакам да ви кажам дека ќе направам една пауза од социјални мрежи, од креирање и создавање. Премногу работи ми се собраа, мислам дека е време за тишина, за мир и за благосостојба на умот. Ќе ве известам кога ќе се вратам. Се гледаме и слушаме“, изјави Таско.

 

View this post on Instagram

 

A post shared by Tasko (@tasko.ur)

Иако не откри конкретна причина за оваа одлука, многу негови фанови и колеги музичари му изразија поддршка, охрабрувајќи го да го стави личниот мир и менталното здравје на прво место.

Таско последните години се наметна како еден од најактивните претставници на новата генерација хип-хоп изведувачи во Македонија, особен успех имаше и по последната песна „Сатурн“ во соработка со Теа Трајковска.