Тутунарот Крсте Дуковски од Прилеп објави видеа на кои се гледа како непознати лица крадат голема количина на тутун што тој го подготвувал за продажба. Според него, тутунот бил резултат на едногодишен напор и жртвување на неговото семејство.

– Минатата година беше најтешката за мене и мојата фамилија, товар што никој друг не може да го почувствува под мојата кожа. Оваа година вложивме сè: мака, здравје, пари и трпение, со надеж дека трудот и натчовечката жртва ќе го покрие ланскиот непребол. Ова што го гледате на видеата е кражба на месеци натчовечки труд, надеж и иднина – вели Дуковски.

Тој вели дека видеата не ги објавил од омраза, туку за да се поттикне свеста и емпатијата и да се охрабри полицијата да ги пронајде сторителите. Ги повикува сите кои ги препознаваат лицата да ги пријават кај полицијата.

„Не барам милостина – барам правда и почит за својот труд“, додава тој.