Фудбалерите на Ливерпул на убедлив начин се вратија на победничките патеки, откако на „Енфилд“ во рамки на 24. коло од Премиер лигата го совладаа Њукасл со 4-1, ставајќи крај на серијата од пет првенствени натпревари без победа.

Иако почетокот не најавуваше ваков епилог, бидејќи гостите поведоа во 36. минута со погодокот на Гордон и внесеа немир на трибините, реакцијата на „црвените“ беше молскавична. За само две минути Ливерпул направи комплетен пресврт, а двата гола ги постигна расположениот Екитике, со што домаќините на пауза заминаа со предност од 2-1.

Во второто полувреме Ливерпул целосно ја презеде контролата врз играта и ја потврди доминацијата. Прашањето околу победникот практично беше решено во 67. минута, кога Вирц го постигна третиот гол. Точка на натпреварот стави Конате, кој во третата минута од судиското надополнување ги постави конечните 4-1.

Со овој триумф, Ливерпул го прескокна Манчестер Јунајтед на табелата и се искачи на петтата позиција, додека Њукасл остана на 10. место. Во следното коло „црвените“ ги очекува големо дерби против Манчестер сити, додека Њукасл ќе го пречека Брентфорд.