Град Скопје ја објави листата со 571 име според која во иднина би се именувале улици, плоштади, паркови и мостови во градот. Покрај новите имиња се предвидува да се вратат и старите имиња на улиците, со што „Аминта Трети“ пак да биде „Ленинова“, „Јордан Мијалков“ – „Железничка“, „Филип Втори“ – „Стив Наумов“. Тафталиџе повторно ќе ја има улицата „Мексичка“ наместо „Петре Пирузе“, а „Борис Сарафов“ пак ќе стане „4 Јули“. Во листата на нови имиња се пејачот Дејви Боуви и групата „Квин“, групите „Леб и сол“, „Лева патика“ и „Мизар“. Улица ќе биде именувана и по Есма Реџепова, како и по филмот „Медена земја“.

Во листата со нови имиња за улици се и имињата на починатиот новинар Никола Младенов, пејачката Вања Лазарова, архитектот Живко Поповски, спортистите Благоја Георгиевски – Буштур, Атина Бојаџи, заменик-градоначалникот на Скопје, Енвер Малиќи, потоа имињата на писателите Петре М. Андреевски, Блаже Конески, Владо Малески.

Се предлага еден плоштад да се вика „Вера, надеж и љубов“, а Градски парк би се викал „Безвременски“. Планот е да се вратат старите имиња на дел од скопските улици што беа сменети во периодот кога мнозинството во градскиот Совет и градоначалничкото место во главниот град и во повеќето општини ги имаше ВМРО-ДПМНЕ. Бранот на преименувања на улиците, кои добија партиски и антички предзнак, тогаш предизвика бурни реакции во јавноста.

Каква симболика претставуваат некои од имињата и овој пат во јавноста и на социјалните мрежи се отвори полемика за тоа која личност или име е соодветно а кое не. Гостин во „Утрински брифинг“ беше шефот на кабинетот на скопскиот градоначалник Петре Шилегов, Никола Наумовски.

– Градот има обврска да го апдејтира списокот на имиња секои неколку години. Последниот пат тоа беше направано на скандалозен начин. Она што денеска го правиме е да ги вратиме имињата на улиците кои беа дел од скопската мапа. Крајно неодговорно е на секоја најава на градската администрација советничката група на ВМРО-ДПМНЕ да оди контра. Она што ние го имаме е тоа дека нема име кое што може да и ги помати сметките или да и биде трн во око на опозицијата. Од она кое што точно сме сигурни дека ќе мора да се случи е дека имињата од периодот на солидарноста и повоениот период ќе мора да се вртат во Скопје. Ако не го направиме тоа, ние го забораваме земјотресот и помошта што југословенската и светската заедница му ја дадоа на Скопје, изјави Наумовски.

Целиот разговор со советникот на градоначалникот Петре Шилегов, Никола Наумовски може да го погледнете во видеото