Македонската фудбалска репрезентативка Наташа Андонова има нов клуб во својата богата интернационална кариера. Искусната офанзивка потпиша за швајцарски Сервет, каде што во наредната сезона ќе има можност да ја брани шампионската титула и да настапува во Лигата на шампионите.

Швајцарскиот клуб официјално го потврди ангажманот на Андонова, од која очекува да донесе дополнителен квалитет, лидерство и искуство во составот пред стартот на новата сезона.

Последната сезона македонската репрезентативка ја мина во шпански Мадрид, а во текот на кариерата настапуваше и за Ал-Шабаб, Леванте, Барселона, ПСЖ, Росенгард, Потсдам и Борец. Првите фудбалски чекори ги направи во Тиквешанка.

Во дресот на македонската репрезентација Андонова досега има одиграно 40 натпревари и постигнато 14 голови, потврдувајќи го својот статус како една од најдобрите македонски фудбалерки во историјата.