Најмалку 15 луѓе, меѓу кои и 10 жени, се потврдени како загинати откако се урна рудник за злато во ридовите Румос во округот Вест Покот Каунти, околу 400 километри северозападно од главниот град Најроби во Кенија, пренесува агенцијата Анадолија.

Според локалните жители и спасувачки служби, уривањето се случило доцна во четвртокот додека рударите работеле во неформалниот рудник за злато, при што десетици луѓе останале заробени под земја.

Исак Ломваи, локален административен функционер задолжен за координација на безбедноста во областа, изјавил за локалните медиуми дека досега од местото биле извлечени 15 тела.

„Продолжуваме со спасувачките операции. Камен паднал врз делот каде што работеле пред рудникот да се урне, оставајќи ги заробени“, изјавил Ломваи.

Кенискиот Црвен крст соопшти дека спасувачките операции продолжуваат поради стравувањата дека уште рудари можеби се заробени под урнатините.

„Сè уште се слушаат звуци од урнатото место, што предизвикува стравувања дека повеќе луѓе би можеле да бидат заробени под земја“, соопшти организацијата.

Итните служби, локалните жители и волонтерите копаат низ урнатините во обид да стигнат до заробените рудари, додека властите предупредуваат дека нестабилното земјиште продолжува да ги отежнува спасувачките напори, особено поради обилните дождови во областа.

Нелегалните и неформалните рударски активности и натаму се чести во делови од Кенија, каде слабите безбедносни стандарди, недоволната контрола и опасните практики на ископување често доведуваат до смртоносни несреќи.

Во декември 2024 година, неколку рудари останаа заробени по уривање на рудник за злато во Рариеда во западна Кенија, додека друго уривање во Какамега Каунти во 2023 година однесе повеќе животи по обилни врнежи што ги ослабнале рударските окна.