Премиерот Христијан Мицкоски и скопскиот градоначалник Орце Ѓорѓиевски синоќа се прошетаа низ центарот на Скопје, а и ветуваа што ќе направат тој да се разубави.

Вечерната прошетка проследена со специјално монтирано видео кое се шири на социјалните мрежи и на провладините медиуми, потсетува на слични ПР-досетки веќе популарни кај политичари во регионов. Мицкоски, додека се движат кај на плоштадот „Македонија“ и Камениот мост, го „преслушува“ Ѓорѓиевски на начин идентичен на оној од снимките на кои српскиот претседател Александар Вучиќ, во манир на партиски шеф, „строи“ функционери избрани или именувани на функции пониски од неговата.

Мицкоски во видеото го испрашува скопскиот градоначалник и се поставува како шеф за теми кои немаат допирни точки со надлежностите на премиерот: празничното осветлување на Скопје, како изгледа центарот на Градот и колку се средени делови од Градскиот парк.

„Со осветлувањето до каде си? Ќе биде брзо?“ – прашува Мицкоски, а Ѓорѓиевски одговара дека ќе биде, на почетокот на декември.

„Мора центаров да биде тип топ“ – вели премиерот Мицкоски потоа во видеото, кое го објави порталот „Прес24“.