Фудбалерите на Интер продолжуваат сигурно да чекорат кон титулата во Серија А, откако на домашен терен ја совладаа Џенова со 2-0. Скудетото сè повеќе изгледа како прашање на време за „нераазурите“.

По разочарувачката елиминација во плејофот од Лигата на шампионите против Бодо глимт, тимот предводен од Кристијан Киву целосно се фокусираше на домашното првенство, каде што засега нема вистинска конкуренција.

Патот до новите три бода беше отворен во 31. минута, кога Федерико Димарко ја затресе мрежата за водство од 1-0, резултат со кој се замина на паузата. Во второто полувреме, Хакан Чалханоглу од белата точка во 70. минута ги постави конечните 2-0.

Интер сега има 13 бодови повеќе од градскиот ривал Милан, кој има и натпревар помалку и утре му гостува на Кремонезе. Разликата е голема, а шампионската трка сè повеќе личи на формалност.