Интер ја потврди фаворитската улога во финалето на Купот на Италија и со сигурни 2-0 славеше против Лацио во натпреварот одигран во Рим.

„Нераѕурите“ практично ја завршија работата уште во првото полувреме, кога ги постигнаа двата гола што се покажаа доволни за трофејот. Резултатот беше отворен во 14. минута, кога Адам Марушиќ несреќно ја затресе сопствената мрежа и му донесе предност на Интер.

По нешто повеќе од половина час игра, Дензел Дамфрис одзеде топка на средината од теренот и веднаш асистираше до Лаутаро Мартинез, кој без проблеми погоди на празен гол за 2-0.

Фудбалерите на Лацио во првите 45 минути не успеаја ниту еднаш да шутираат во рамките на голот на Интер, а иако во второто полувреме прикажаа подобра игра, недостигаше реализација за да се вратат во натпреварот.

Со овој триумф Интер стигна до двојната круна сезонава, откако претходно веќе ја обезбеди и шампионската титула во Серија А.