Ракометарите на Србија во саботата вечер приредија големо изненадување на Европското првенство, откако во рамките на второто коло од првата фаза со 30-27 ја совладаа селекцијата на Германија.

Со оваа победа, Србија направи огромен чекор кон пласман во следната фаза од шампионатот, а посебно внимание привлече една интересна сцена за време на прославата по натпреварот. Имено, Вања Илиќ триумфот го прослави со скандирање на добро познатата фраза „Deutschland, auf Wiedersehen“ („Германија, збогум“), што не наиде на реакција кај неговиот соиграч, поранешниот голман на Вардар, Дејан Милосављев.

На снимките јасно се гледа како Милосављев му сигнализира на Илиќ да престане со скандирањето, при што од неговите усни може да се прочита „немој“. Останува дилемата дали станува збор за знак на почит кон германската репрезентација, со оглед на тоа што Милосављев настапува во Германија, или пак од страв да не се „предизвика судбината“ во продолжението од турнирот.