Фудбалската федерација на Боливија суспендираше шест судии бидејќи во тамошниот шампионат продолжија натпревар за дури 42 минути.

Eкипата на Палмафлор во понеделникот го победи Блуминг со 3:2, а дуелот во градот Чапаре траеше 132 минути на силен дожд, според „АП“.

Судијата Хулио Гутиерез го продолжи натпреварот за цели 42 минути поради долготрајното ВАР прегледување на видеото од вториот гол на Палмафлор и тепачката што следеше по двата црвени картони кои им беа покажани на играчите на гостинскиот тим.

Блуминг се огласи на Твитер и тврди дека судиите ги изложиле играчите на тимот на висок ризик од повреди поради „преголемо продолжение“.

Еден од директорите на Палмафлор е поранешниот боливиски претседател Ево Моралес, кој на социјалните мрежи напиша дека неговиот тим победил и покрај „сомнителните судии“.

Моралес беше претседател на Боливија од 2006 до 2019 година, а клубот што го предводи годинава влезе во Првата лига.