Катерина Ацевска со два златни медали на меѓународниот џиу-џица турнир во Бања Лука
Катерина Ацевска со нови одлични резултати на меѓународната сцена, македонската натпреварувачка се закити со два златни медали во две категории У21 +70 кг. и сениори +70 кг. за најдобар женски борец на меѓународниот џиу-џица турнир во Бања Лука, Босна и Херцеговина.
Како што информираат од Македонската џиу-џица федерација, Ацевска беше сигурна во својот настап, со одлични борби, полна концентрација и кондиција, борбите ги добиваше рутински.
Во една од финалните борби доби тежок удар со нога во глава, борбата за момент беше прекината, но Ацевска брзо се врати во борбата и на крајот славеше победа.
Нашата земја се закити со вкупно шест медали на овој турнир, Марија Треневска дојде до сребро и бронза настапувајќи во две категории, потоа бронза има Антонио Стојчевски во исклучително тешка група со седум борци, а „бронзен“ беше и Зоран Колевски во категорија со пет борци.
По овој настап во Бања Лука, беа освоени уште три медали на „Србија Опен 2024“: Антонио Стојчевски злато, Марија Треневска сребро и Катерина Ацевска сребро.