Британскиот готвач Џејми Оливер пристигна во Белград, во неговиот „Џејмис Паста Бар“ во „Фуд Хангар“, каде што го пречекаа бројни обожаватели кои чекаа ред за фотографија и средба со познатата кулинарска ѕвезда. Некои од гостите дури и платија за да имаат можност да ги пробаат јадењата на светски познатиот готвач, чие доаѓање предизвика големо воодушевување и голема гужва на локацијата.

Во видеото се гледа како Оливер опуштено комуницира со присутните, ги поздравува обожавателите, се смее, потпишува автограми и се фотографира со нив, а им дели и совети. Тој изјави дека енергијата на градот и луѓето му е фантастична.

Неговиот „Џејмис Паста Бар“ веќе привлекува голем број гости, а овој посебен настан дополнително го зголеми интересот.

Во текот на посетата, тој готвел во три термини кои биле брзо распродадени. Гостите кои успеале да резервираат место уживале во пржени лазањи, крцкави лигњи, брускети со домати и тартар, паста со ракчиња, кремаста карбонара, таљатели болоњезе и рижото росо.

Целото мени носи назив „Џејми ја слави Италија“ и е инспириран од традиционалната италијанска кујна. Цената на менито изнесува 7.500 динари, односно околу 64 евра по лице.

Џејми Оливер го сподели својот престој во Белград и на социјалните мрежи, каде што објави фотографии и видеа од настанот.