Се надевам дека наскоро повторно ќе гледаме ракомет. Во моментов имаме пауза за репрезентации што можеби е дополнителен ризик, но тоа е одлука на ЕХФ. Во домашното првенство прекинот настана поради правилникот каде се бара 72 часа пред секој натпревар да има тестирање. Ова сега ќе донесе некои измени и додека се усогласат правилниците настана мала пауза. Од круцијално значење е спортот и за некои помали клубови би било доста погубно доколку настане подолга пауза, изјави спортскиот директор на РК Еурофарм – Пелистер Димитар Митревски, за тоа како случувањата поврзани со пандемијата на ковид-19 влијаат на ракометот, и воопшто на спортот.

-Чекаме да заврши репрезентативниот собир и би требало да започнеме брзо после тоа. Да се доигра првиот дел од домашната лига, па напролет да се продолжи со плеј-оф. На нас како ракометен клуб ни влијае многу. Мое субјективно мислење е дека ова ќе беше година кога највеќе ќе уживавме и после 15 години Еурофарм – Пелистер ќе се бореше за титулата. Но веќе три месеци сме во еден дренажен процес и имаме само еден натпревар, рече Митревски.

Патувањата се тешки за организирање, тестирањето е оптеретување. Добар дел од спонзорите ги намалуваат средствата или се откажуваат поради кризата. Има доста препреки, но ние се радуваме да се игра ракомет, да се продолжи со темпо и да го дочекаме плеј-офот и дотогаш ќе има подобри времиња за натпреварување, вели Митревски.