Огромна експлозија која личи на оние во акциските филмови ги потресла пред два дена жителите на загрепската населба Трешњевка. Снимката која на порталот „24 сата“ му ја испратил читател, покажува како опасно се забавувале деца во двор од основно училиште, предизвикувајќи потрес и голема „печурка“ од оган и чад која се издига во височините.

Како што потсетува порталот, минатата година на истото игралиште имаше слична експлозија, а полицијата утврди дека причина била импровизирана експлозивна направа направена од петарди прицврстени на канистер со бензин.

„Утврдено е дека импровизирана направа направена од запалива течност и одреден пиротехнички агенс вметнат во течноста била активирана во областа Трешњевка, а кривичната истрага за утврдување на идентитетот на сторителот и сите околности е во тек“, велат од полицијата.

Полицијата секојдневно апелира хрватските граѓани да не користат пиротехника за новогодишните празници. Во земјата секоја година има по неколку случаи на тешки повреди предизвикани од петарди и ракети за огномет, а жртвите најчесто се деца.