Минеаполис денеска е во очај по убиството на жена од службеник за имиграција и царинска контрола (ИЦЕ) кој учествувал во најновата акција на администрацијата на Трамп против имиграцијата, при што гувернерот апелираше до луѓето да останат смирени, а училиштата ги откажаа часовите и активностите како безбедносна мерка, пренесува АП.

Државните и локалните власти побараа од ИЦЕ да ја напушти државата откако 37-годишната Рене Никол Меклин Гуд беше застрелана во главата. Но, министерката за внатрешна безбедност Кристи Ноем рече дека агентите не одат никаде.

Одделот за внатрешна безбедност распореди повеќе од 2.000 полицајци во областа во она што го нарекува најголема операција за спроведување на имиграцијата досега. Ноем рече дека се уапсени повеќе од 1.500 луѓе.

Убиството на Меклин Гуд во средата наутро во станбена населба јужно од центарот на градот беше снимено на видео од сведоци, а до вечерта стотици луѓе излегоа на бдеење и ја повикаа јавноста да се спротивстави на спроведувањето на имиграцијата. Некои потоа скандираа додека маршираа низ градот, но немаше насилство.

Жената што беше смртно застрелана од службеник за имиграција во Минеаполис во средата беше Рене Никол Меклин Гуд, 37-годишна мајка на три деца која неодамна се преселила во градот.

Според Асошиејтед Прес, Гуд била државјанка на САД родена во Колорадо и никогаш не била обвинета за кривично дело, со само еден сообраќаен прекршок во нејзиното досие.

На своите профили на социјалните мрежи, Меклин Гуд се опишуваше себеси како „поетеса, писателка, сопруга и мајка“. Во неодамнешните објави, таа спомена дека моментално „го открива Минеаполис“ и го додаде емотиконот со знамето во боите на виножитото на својот инстаграм-профил.

Нејзината профилна слика на Pinterest ја покажува како се смее и држи мало дете блиску до образот, додека нејзините објави главно се фокусирани на теми како тетоважи, фризури и декорација на домот.

Нејзиниот поранешен сопруг, кој побара да не биде именуван поради безбедноста на своите деца, рече дека Гуд штотуку го оставила нивниот 6-годишен син во училиште во средата и дека возела кон дома со својот партнер. На патот, тие наишле на група агенти на ИЦЕ на снежна улица во Минеаполис, каде што двојката се преселила минатата година од Канзас Сити, Мисури.

Видеата од пукањето покажуваат како полицаец се приближува до џип запрен на средина од патот, барајќи од возачот да ја отвори вратата и фаќајќи ја рачката. Возачот на Хондата почнува да се движи напред, а друг полицаец од Одделот за внатрешни работи што стои пред него, го вади оружјето и веднаш испукува најмалку два истрела од блиску, скокајќи назад додека возилото се движи кон него.

Here’s the best angle of the ICE shooting in Minneapolis. Absolutely unnecessary. The victim is reported to be a legal observer and U.S. citizen. pic.twitter.com/mbq1bYwW9U

— Houtan Yaghmai, Esq. (@houtan_esq) January 7, 2026

Функционерите на администрацијата на Трамп во последните часови ја прикажаа Меклин Гуд како проблематична личност која се обидела да се забие во федералните агенти со своето возило. За време на прес-конференцијата синоќа, министерката за внатрешна безбедност Кристи Ноем рече дека жртвата „ги следела (полицајците) и ја попречувала нивната работа во текот на целиот ден“. Таа додаде дека полицаецот од ИЦЕ кој отворил оган бил удрен од возило во јуни кое „го влечело неколку метри“.

Поранешниот сопруг на 37-годишната жена, сепак, вели дека таа не била активистка и никогаш не ја видел да учествува во каков било протест.

Тој ја опиша како побожна христијанка која била на мисионерски патувања во Северна Ирска кога била помлада. Таа била пејачка, пеела во средношколски хор и студирала хорско пеење на колеџ.

Студирала креативно пишување на Универзитетот Олд Доминион во Вирџинија и освоила награда во 2020 година за една од нејзините драми, според објава на фејсбук-страницата на одделот за англиски јазик на универзитетот. Таа, исто така, водеше поткаст со вториот сопруг, кој почина во 2023 година.

Гуд имаше ќерка и син од нејзиниот прв брак, кои сега имаат 15 и 12 години. Нејзиниот 6-годишен син беше од нејзиниот втор брак.

Нејзиниот поранешен сопруг рече дека во последните години Гуд првенствено била вклучена во одгледувањето на нејзините деца, иако претходно работела како стоматолошки асистент и како вработена во кредитна задруга.

Дона Гангер, нејзината мајка, изјави за „Минесота Стар Трибјун“ дека семејството било известено за нејзината смрт доцна во среда наутро.

„Рене беше една од најљубезните луѓе што сум ги познавала“, изјави Гангер за весникот. „Таа беше неверојатно сочувствителна. Се грижеше за луѓето целиот свој живот. Беше полна со љубов, прошка и нежност. Беше неверојатна личност.“

ВИДЕО: Имиграциски агент уби возач во Минеаполис – инцидентот предизвика хаос во градот