Во рамките на 25. коло од Првата македонска фудбалска лига, денеска се одиграа уште два натпревари, во кои домашните екипи Брера и Силекс стигнаа до победи.

Во Струмица, Брера имаше тежок почеток, откако гостите Чегране дојдоа до водство по само три минути. Сепак, домаќините брзо се вратија во игра и веќе во 10-тата минута го израмнија резултатот, а со по еден гол на двете страни се замина и на одмор. Во второто полувреме решавачкиот момент се случи околу десет минути пред крајот, кога Петровиќ го постигна победничкиот гол за Брера.

Во Кратово, пак, немаше никаква неизвесност. Силекс одигра убедливо и со високи 6-0 го совлада Шкупи, кој веќе е надвор од трката за опстанок. Во листата на стрелци се запишаа Алиќ, Пиреш, Мирчевски, Бутуровиќ, Анѓелески и Донов.

За двете екипи, Брера и Силекс, овие победи доаѓаат по серија од четири натпревари без триумф, во кои забележаа по две ремија и два порази.