Фудбалерите на Баерн Минхен приредија вистинска драма и покажаа зошто важат за шампионски тим, откако од негатива од три гола успеаја да направат целосен пресврт и да слават со 4-3 на гостувањето кај Мајнц.

Домашниот состав имаше фантастично прво полувреме и на пауза замина со убедливи 3-0 благодарение на погодоците на Кор, Небел и Беренс. Сепак, второто полувреме донесе сосема поинаква слика на теренот. Баварците тргнаа офанзивно, а сигналот за враќање во игра го даде Николас Џексон. Возбудата дополнително се засили кога Мајкл Олис намали на 2-3 во 73. минута.

Баерн продолжи да притиска, што резултираше со израмнување преку Џамал Мусиала во 80. минута. Само неколку моменти подоцна, Хери Кејн го комплетираше неверојатниот камбек и ги постави конечните 4-3, носејќи му нови три бода на својот тим.

Во останатите натпревари, Баер Леверкузен дојде до важна победа на гостувањето кај Келн (2-1), каде двоен стрелец беше Патрик Шик, со што тимот се доближи до позициите што водат во Лигата на шампионите. Хајденхајм славеше против Сент Паули со 2-0, Аугзбург и Ајнтрахт Франкфурт одиграа нерешено 1-1, додека дуелот меѓу Волфсбург и Борусија Менхенгладбах заврши без погодоци.