Неколку македонски поети од помладата генерација го започнаа Скопскиот поетски фестивал, чиешто прво издание се одржува од 1 до 3 септември во МКЦ.

„Новото време ни даде слобода на изразување, хибридни комбинации, луѓе кои говорат и други јазици, коишто пишуваат на различни јазици и мислам дека нашата најголема сила во целата работа, освен ентузијазмот што го поседуваме е тоа што секој од нас сака да направи нешто за овој град, за нашата земја, за нашиот јазик, за нашата култура, бидејќи град како Скопје, навистина би било убаво да се најде на една светска мапа заедно со други книжевни фестивали и да може да се поврзуваме со Берлин, Сараево, или Белград, затоа што јазикот е едновремено и мост но во голема мера и комуникација со самите луѓе кои би дошле, или ние би отишле кај нив. Автентичноста, специфичноста, радоста, музиката…се’ што е еден поширок свет којшто ние го правиме и се обидуваме тоа да го пренесеме овие денови, мислам дека ќе биде една оддишка и она што ни се собирало и не’ притискало сега ќе може да го кажеме како што доликува“, вели за Утрински брифинг, Ана Голејшка Џикова, поетеса и една од основачите на Скопскиот поетски фестивал.

По вчерашното свечено отоврање, вечерва, во МКЦ ќе се претстават пет странски поети Марија Дејановиќ од Хрватска, Сергеј Тимофеев од Латвија, Танос Гогос од Грција, Ким Симонсен од Фарски Острови, Вонбјошт Ванг од Фарски Острови и македонската поетеса Лидија Димковска.

Покрај поетските читања ќе има и филмски проекции на поетски филмови во соработка со „Киноскоп“, фестивал на аналогни и експериментални филмови од Белград. Отворена е и изложба на дела што се директно инспирирани или комуницираат со конкретна песна на секој од поетите што настапуваат на фестивалот.