Британската министерка за надворешни работи, Ивет Купер, предупреди дека вештачката интелигенција (ВИ) мора да биде глобално регулирана пред да се демонстрира нејзината разорна моќ, објави „Индепендент“.

Таа изјави дека е потребен меѓународен договор за безбедноста на вештачката интелигенција за нејзиниот потенцијал да може безбедно да се искористи.

Купер оцени дека меѓународните договори за нуклеарното оружје биле постигнати дури по демонстрацијата на неговата „страшна моќ“ на крајот од Втората светска војна, но нагласи дека „не смееме да си дозволиме да чекаме ВИ еквивалент на Хирошима“.

Панелот на ОН за вештачка интелигенција претходно овој месец предупреди дека „јазот меѓу брзо унапредените способности и ефективните методи за управување со ризици може да доведе до катастрофални последици“.

Алијансата за разузнавање „Фајв ајс“ – Велика Британија, САД, Канада, Австралија и Нов Зеланд – предупреди дека кибернапади потпомогнати од вештачка интелигенција би можеле да се случат во рок од само неколку месеци.

Во текст за кралскиот институт за меѓународни односи „Чатам Хаус“, министерката за надворешни работи изјави дека Обединетото Кралство е добро позиционирано да води во областа на безбедноста на вештачката интелигенција, надоврзувајќи се на самитот во Блетчли Парк одржан во 2023 година под тогашниот премиер, Риши Сунак.

„Пазете се од злоупотреби со вештачка интелигенција“ — Британија ги предупреди родителите да не објавуваат фотографии со деца

Таа додаде дека постојат „јасни паралели со меѓународниот консензус што Обединетото Кралство помогна да се изгради околу нуклеарната безбедност по Втората светска војна“, што довело до договори кои овозможиле развој на нуклеарната енергија и контрола на нуклеарното оружје.

„Но, вакви договори меѓу глобалните сили за вештачката интелигенција не постојат. Кај нуклеарното оружје, меѓународен договор дојде дури откако светот ја виде страшната моќ на новата технологија во Хирошима – и се запраша што би се случило ако таа падне во погрешни раце. Не смееме да чекаме ВИ еквивалент на Хирошима пред да делуваме“, рече таа.

Есејот – „Местото на Британија во новиот светски поредок“ – наведува дека луѓето во Велика Британија сè повеќе ги чувствуваат последиците од глобалната нестабилност, од раст на цените на енергијата и храната до миграциски притисоци и ризик од кибернапади.

Купер оцени дека постои обновена конкуренција меѓу големите сили, ослабени меѓународни правила и оружјување на глобалните синџири на снабдување во области како енергијата и технологијата.

Таа додаде дека е потребно „да се зајакне Британија во секој поглед и таа сила да се користи и како сила за добро во светот, а пред сè како сила за подобрување на животот на британските граѓани“.

ВИДЕО | „Гугл“ ги претстави напреднатиот модел „Џемини“ и новиот „Омни“, во обид да одговори на сè посилната конкуренција во вештачката интелигенција