Американскиот претседател Доналд Трамп вчера упати нов напад кон италијанската премиерка Џорџа Мелони, преку објава на неговата платформа „Трут сошиал“, во која сподели фотографија на која таа гледа кон него, со натпис „Потребна е забрана за приближување“, објави „Анса“.

Трамп и Мелони претходно имаа пријателски односи, сè додека не дојде до разидување околу одбивањето на Италија да ги поддржи САД во војната со Иран.

Во моментот на објавување, Мелони сè уште не реагирала на новиот напад.

Лидерот на центристичката опозициска партија Ационе, Карло Календа, застана во одбрана на Мелони, нарекувајќи го Трамп „презрив насилник од ниска класа“.

Спорот го поттикна изјавата на Трамп дека Мелони „го молела“ да се фотографира со неа на минатомесечниот самит на Г7.

Таа одговори дека приказната е измислена и го критикуваше Трамп дека лошо се однесува кон сојузниците, додека е попустлив кон противниците на Западот.

Откако Трамп ја засили критиката со нов напад, тврдејќи дека Мелони сакала да ги поправи односите со него само за да го подобри својот домашен рејтинг, премиерката возврати дека неговите изјави се „бесмислени“, додавајќи дека нејзините односи со него не ѝ помогнале во популарноста и дека нејзиниот рејтинг не е негова работа.

Таа додаде дека нема намера понатаму да го коментира спорот.

Трамп тврди дека Мелони го молела да се сликаат—таа му порача дека Италија никогаш не моли никого