Велешанката Моника Јовановска која што јавно сведочеше за својата голгота, дека била силувана и тепана од поранешното момче, после денешното судење била итно пренесена во велешката болница на нервното одделение затоа што здравствената состојба исклучително и се влошила, потврдуваат од болницата за Слободен печат.

Неофицијално, фактот што велешкото обвинителство ја отфрли кривичната пријава за силување на девојката, допринел нејзината психичка и здравствена состојба да биде исклучително тешка. Се обидела и да работи, меѓутоа не можела, постојано е на терапија и преживува тежок период во животот.

Новинарката која го обелодени случајот Менче Точи, на Фејсбук напиша дека според кажувања на мајката, Моника е во тежок шок, не препознава никого, а по одлуката на ОЈО Велес кое ја отфрли кривичната пријава против насилникот, младата девојка сега поминува низ пекол – силувана, тепана, давена, и дополнитено во психичка криза.

Таа шест месеци чекаше обвинителството воопшто да почне да се занимава со случајот.

Настанот се случил на 2 август, на автопатот Скопје-Велес, на враќање од кафуле во кое Моника била да разговара со поранешното момче и одбила да продолжи да биде во врска со него.