Капитенот на Ливерпул, Вирџил ван Дајк, упати жестока критика кон тимот по шокантниот пораз од Нотингем Форест на „Енфилд“, истакнувајќи дека играчите не покажале борбеност и дека ја изневериле довербата на тренерот.

„Дефинитивно го изневеривме тренерот, но и самите себе. Прво мораш да се погледнеш во огледало, а потоа да видиш како можеш да им помогнеш на другите да излеземе од овој хаос. Зашто во моментов – ова е хаос, и тоа е факт“, изјави холандскиот дефанзивец.

Ван Дајк додаде дека во клуб како Ливерпул нема место за играчи без борбен дух.

„Како шампиони не смееме да бидеме во ваква ситуација. Прашањето е што ќе направиме за да го смениме тоа. Ќе се обидеме да ја свртиме сезоната – тоа е менталитетот што сите мора да го имаме“, порача капитенот.

Тој откри дека атмосферата во соблекувалната по поразот била напната:

„Имаше лутина и бес – и треба да има. Секој мора да преземе одговорност. Не знам дали сите го прават тоа, но мора да го направат. Тоа е основно.“

Ван Дајк беше особено разочаран од лесните примени голови и лошиот менталитет на екипата:

„Примаме премногу голови, губиме дуели… Сите сме одговорни. Не можеш да губиш дома со 3:0. По првиот гол настапи паника, а тоа е недозволиво. Второто полувреме го почнавме катастрофално. Тоа е тешко за прифаќање.“

И покрај серијата лоши резултати, капитенот истакна дека нема намера да се предаде:

„Не сум човек што се предава. Никогаш нема да се предадам. Ќе продолжам да се борам без разлика колку е тешко.“

Ливерпул во Премиер лигата сезонава има по шест победи и порази, со гол-разлика која е негативна – примиле 20, а постигнале 18 гола. Тимот веќе испадна од Лига купот, а во Лигата на шампионите има три победи и еден пораз, пред средбата со ПСВ што следи во среда.