Во „Галерија 2“ на Младинскиот културен центар во Скопје на 20 ноември (понеделник), во 20 часот, ќе биде отворена изложба на која ќе биде претставен заедничкиот проект „Нова перспектива / Трансформер продукција“ на авторките Елизабета Тошевска и Анета Стојчевска. Изложбата ќе биде поставена до 4 декември.

„Нова перспектива / Трансформер продукција“ е замислен како заеднички проект на ликовните уметници Елизабета Тошевска и Анета Стојчевска, во кој, секоја со својот уметнички израз и визуелна перцепција на уметничкото дело – скулптура, претставува нови поинакви трансформирани видувања на мотиви/ форми/ принципи користени низ историјата на уметноста.

– Елизабета Тошевска ја истражува женската фигура, и воопшто жената, низ времето и не запознава со внатрешното длабоко – Јас. Таа, преку делата ни прикажува интимен разговор со себе, но во истовреме го провоцира и поттикнува набљудувачот на размислување за времето што непрекинато изминува покрај нас и како неосетно остава траги на нашата личност.

Додека, Анета Стојчевска, инспирана од ликовната уметница Рејчел Вајтрихт и нејзиниот принцип со користење на негативи, израборува макети од огледала на нов проектиран простор-просторија, истите ги умножува со мала видлива разлика во нивните големини, доближувајќи ги до производ од сериско производство.

Покрај заедничкиот наслов дополнително е замислено користење на одделни наслови и поднаслови аплицирани – испишани кај фотографиите од скулптурите на Елизабета Тошевска и кај скиците / плановите на Анета Стојчевска, поставени во простор визуелно физички одделен од просторот во кој би биле претсавени: скулптурите и 3Д-макетите од огледала – посочува проф. д-р Трајче Стојанов, естетичар.

Елизабета Тошевска (Скопје, 1972) е дипломиран вајар на ликовната академија во Штип кај проф. Слободан Милишески во 2019 година, додека Анета Стојчевска (Крива Паланка, 1983) дипломира во 2009 година на Факултетот за ликовни уметности – Скопје, на педагошки оддел, отсек скулптура во класата на професор Станко Павлески.