Украдена златна тоалетна школка, вредна околу 5 милиони долари (ВИДЕО)
Осумнаесет каратна златна тоалетна школка била украдена во текот на ноќта од палатата Бленхајм каде е роден Винстон Черчил, јави Би-би-си.
Провалниците во раните утрински часови, околу 4:50 часот, провалиле во палатата и го украле ова уметничко дело, соопшти полицијата.
Златната тоалетна школка наречена „Америка“ не е пронајдена, но во врска со случајот е уапсен 66-годишен маж.
Школката е дел од изложбата на италијанскиот концептуален уметник Маурицио Кателано која била отворена во четвртокот.
Поради кражбата дошло до „значителна штета и поплава“ бидејќи школката била вградена во подот и цевките. Била целосно функционална и уметникот ги поканил посетителите да ја користат.
Уметникот ја проценува вредноста на „Америка“ на повеќе од 5 милиони долари, пренесе Си-ен-ен.
Палатата од која е украдена златната школка се наоѓа на списокот на светско наследство и е родно место на Винстон Черчил. Додека истрагата е во тек затворена е за посетители.
Во палатата Бленхајм, тоалетот бил инсталиран покрај собата во која е роден Черчил. Во каталогот на изложбата стои дека делото може да се види како коментар на социјалните политички и економски различности во Соединетите Американски Држави.
