Автомобилот „Ауди А6“, со кој избегале напаѓачите кои пукаа и убија двајца луѓе во бар во старата скопска чаршија, е пронајден запален во Шуто Оризари, потврдија полициски извори за „Телма“.

Автомобилот, кој имал украдени регистарски таблички, бил пронајден изгорен на улицата „Вашингтонска“ во Шутка, а во него имало остатоци од два мобилни телефона.

Откако го „исчистиле“ возилото од можните докази кои можат да водат до нив, убијците избегале ао друг автомобил. Од МВР засега не соопштуваат детали за потерата и за осомничените, освен дека станува збор за повеќе напаѓачи кои пукале кон убиените.

Убиениот Јетон Кривањева, со прекар Жила, пред три години беше мета на сличен напад во хотелот „Александар палас“. Слично како и тогаш, и вечерва напаѓачите биле облечени во црна облека и носеле фантомки, велат полициски извори за „Телма“. Уште една сличност со инцидентот од 2019 година е тоа што и вечерва во „Шиша бар“, напаѓачите извикале „полиција“ и се обиделе да создадат впечаток дека се работи за полициска рација.