Уапсени 14 гостиварци, биле на излет и пукале од огнено оружје, заталкан куршум завршил во жена
Ноќеска во 01.30 часот во гостиварско Чегране, полициски службеници од Полициското одделение Чегране при Секторот за внатрешни работи Тетово лишиле од слобода 13 лица од Чегране и едно лице од Гостивар.
„Уапсените лица околу 20.30 часот во близина на селото организирале излет и се сомничат дека пукале од огнено оружје, а еден заталкан куршум ја повредил 52-годишната Р.Ф., која била во двор во селото. Таа била пренесена во Ургентен центар Гостивар каде и била укажана лекарска помош. Се преземаат мерки и активности за целосно расчистување на случајот, по што ќе биде поднесена соодветна пријава“, информираат од Секторот за внатрешни работи Тетово.
За време на семејни веселби, а во последно време и на разни забави и излети во полошко се почеста е употребата на огнено оружје и пиротехника.
Апелите како и превентивно-едукативните активности на полицијата како последната „Слави со срце не со оружје“ за запирање на ваквата практика се постојани, но навиката кај луѓето во полошко не се менува.
Вчера исто така во 22.25 часот во СВР Тетово било пријавено дека во двор од куќа на ул.,,107“, при семејна забава, биле употребени пиротехнички средства. Полициски службеници излегле на местото, а на сопственикот му бил поднесен соодветен поднесок.