Турција размислува за купување на уште една серија на ракетен одбранбен систем С-400 од руско производство, и покрај тоа што тоа е точка на сопнување во односите со НАТО сојузникот, САД, јави ДПА.

Турскиот претседател Реџеп Таип Ердоган рече дека „нема резерва” во врска со можноста да купи повеќе С-400, информира државната новинска агенција Анадолија. Ердоган додал дека за ова прашање ќе разговара на следното патување во Русија.

Шефот на рускиот државен извозник на оружје Рособоронекспорт, Александар Микејев, пред неколку дена изјави дека преговорите со Турција за купување на повеќе С-400 се при крај.

– Во блиска иднина, ние и нашите партнери ќе започнеме со изготвување и потпишување договор, рече Микејев.

Турција и САД долго време беа во расправија околу купувањето на одбранбениот систем, а минатата година, за време на поранешниот американски претседател Доналд Трамп, САД воведоа санкции поради тоа.