Градежен шут, мебел, ќебиња, јамболии, трупови од животни, пелени, влажни марамчиња, остатоци од храна. Ова е само дел од отпадот кој наместо во кантите за отпад или на депонија, несовесните граѓани го фрлаат во канализација.

Од ЈП „Водовод и канализација“ велат дека и покрај многубројните апели и објаснувања како тоа може да делува на самиот канализациски систем, околината, па и на здравјето на луѓето, сепак некои граѓани и понатаму се решаваат на едно такво место да го одложат отпадот од нивниот дом или од нивното работно место.

– Затнувањето на канализацијата за жал е честа појава и покрај сите апели и објаснувања како тоа може да делува на самиот канализациски систем, околината, па и на здравјето на луѓето. При одзатнување на канализациите, екипите на ЈП „Водовод и канализација“ се соочуваат со причинители од секаков вид – градежен шут, мебел, ќебиња, јамболии, лешеви од животни, пелени, влажни марамчиња, остатоци од храна и слично, велат од претпријатието, притоа додавајќи дека ваквата појава е многу почеста во приградските населби, но, за жал, како што велат од таму, ова не е исклучок и во некои од населбите во централното градско подрачје.

Токму ваквото несовесно однесување од граѓаните е причина за сериозни оштетувања на канализациската мрежа и намалување на нејзината функционалност.

– Штетите што може да се предизвикаат од ваквото несовесно однесување прво се однесуваат на оштетување на канализацискиот систем и неговата функционалност, што предизвикало и може да предизвика враќање на отпадната вода и материите назад во системот до домовите и околината што воопшто не е пријатно и секако може да предизвика и здравствени проблеми и загадување на околината, додаваат од ова јавно претпријатие.

Оттаму велат дека за да се реши овој проблем, потребно е граѓаните да бидат свесни за опасноста од нивни постапки, но и за штетата што се прави од ваквото несовесно однесување.

– Што се однесува до овој проблем, на прво место се става свеста на граѓаните, но и на компаниите изведувачи. Луѓето треба да реагираат соодветно и да се потсетат дека цевките за одведување отпадни води не се депонија во која може да се одложува отпад, па таму тој да се селектира, разградува, па и да се рециклира. Во последните години постојано има кампањи од многу чинители во општеството за правилно одлагање на отпадот и кои се последиците од несоодветно однесување во однос на ова прашање. Последната кампања на ЈП „Водовод и канализација“ по однос на ова прашање „Биди одговорен, однесувај се совесно“ беше во текот на август 2020, а постојано се праќаат повици за совесно однесување и заштита и на водоснабдителниот и канализацискиот систем, што е особено важно за функционалност на пречистителните станици, онаа во Волково која работи и новата за Град Скопје, чиј проект е во фаза на имплементација, велат од јавното претпријатие.

Дополнителен проблем се јавува и поради тоа што сторителите честопати им се непознати, па надлежните институции без да го знаат сторителот, не можат да изречат соодветна казна.

– За да казните некого за извршениот прекршок, треба да го видите како го прави тој прекршок. Улогата за казнување на ваквите сторители е во надлежност на комуналните инспектори и доколку екипите на ЈП „Водовод и канализација“ видат извршување на ваков прекршок, сторителите се пријавуваат во полиција и кај комуналните инспектори и оттаму се преземаат соодветни мерки, објаснуваат од ЈП „Комунална хигиена“.