Поранешниот американски претседател Доналд Трамп најави жалба откако поротата го прогласи за виновен за сексуален напад и клевета на колумнистката Е.Џин Керол во 1990-тите, поточно во соблекувалната на луксузна стоковна куќа во пролетта 1996 година.

„Ќе се жалиме на оваа одлука. Тоа е срамота“, рече Трамп во едно од неколкуте видеа што ги објави на својата платформа „Трут Соушал“.

Трамп тврди дека не знае која е Керол и го нарече судењето многу нефер. На Керол и беше доделена отштета од околу 5 милиони долари за сексуален напад и клевета, што е значителна загуба за поранешниот претседател.

„Некако ќе мора да се бориме со ваква работа. Не можеме да дозволиме нашата земја да падне во оваа бездна. Ова е срамно“, рече Трамп.

Адвокатот на Доналд Трамп, Џо Такопина, ја нарече одлуката на поротата чудна пресуда, истакнувајќи дека поротата го отфрлила барањето за силување против неговиот клиент.

Додека поротата утврди дека Трамп сексуално ја нападнал Е. Џин Керол во 1996 година, доволно за да го смета за одговорен за повредите, поротата не најде докази дека тој ја силувал.

Такопина пред судот во Менхетен изјави дека ќе поднесе жалба на пресудата. Трамп е цврст во своето верување дека не може да добие фер судење во Њујорк, рече адвокатот.

„Мислам дека може да тврдите дека тоа е веројатно точна проценка врз основа на она што се случи денес“, рече Такопина.