Претседателот на Соединетите Американски Држави, Доналд Трамп, денес изјави дека би можел да го прекине федералното финансирање за градот Њујорк доколку кандидатот Зохран Мамдани победи на изборите за градоначалник и рече дека наместо Мамдани ќе го поддржи поранешниот гувернер на Њујорк, Ендру Куомо, јави Би-би-си.

Мамдани, 34-годишен конгресмен од Квинс, предложи политики за подобрување на домувањето и јавните услуги, вклучувајќи бесплатна грижа за деца, замрзнување на киријата и бесплатни градски автобуси.

Трамп го нарече „комунист“ во интервју за Си-би-ес њуз и рече дека е „далеку полош од социјалист“. „Ако Мамдани стане градоначалник, ќе ми биде тешко да му дадам многу пари на градот Њујорк. Ако имате комунист на власт, сè што правите е да ги трошите парите што ги испраќате таму“, рече Трамп.

Во исто време, Мамдани нагласи дека Њујорк ќе продолжи да добива федерални средства бидејќи тоа е законска обврска, а не прашање на волјата на претседателот.

„Ќе продолжиме да добиваме средства од федералната влада и тоа не е поради дарежливоста на Трамп. Тоа е затоа што законот го пропишува тоа“, рече Мамдани.

Мамдани претходно предупреди дека неговиот противник, поранешниот гувернер на Њујорк, Ендру Куомо, ќе биде „марионета на Трамп“ ако победи.

Куомо, од друга страна, тврдеше дека Трамп ќе „го преземе“ Њујорк и ќе ја испрати војската во градот ако Мамдани победи, што американскиот претседател го отфрли како „лудо“, објави Танјуг.

Трамп, исто така, изјави дека, иако не е „обожавател“ на Куомо, ако му се даде избор помеѓу „лош демократ и комунист, тој секогаш ќе го избере „лошиот демократ“.