Американскиот претседател Доналд Трамп и рускиот претседател Владимир Путин денеска ќе разговараат телефонски „колку што е потребно“, соопшти Кремљ. Клучни теми ќе бидат војната во Украина и нормализацијата на односите меѓу Русија и САД.

„Има голем број прашања, од нормализација на односите до ситуацијата во Украина, за кои двајцата претседатели ќе разговараат“, рече Дмитриј Песков.

Трамп во понеделникот рече дека „многу елементи“ од конечниот мировен договор се веќе договорени, но дека „останува уште многу да се направи“. Тој, исто така, ја нагласи итноста на ситуацијата, истакнувајќи дека околу 2.500 војници од двете страни умираат во конфликтот секоја недела.

Сепак, иако Украина веќе го прифати американскиот предлог за 30-дневен прекин на огнот, Путин минатата недела го отфрли предлогот, велејќи дека „во принцип се согласува“, но дека има „нијанси“ кои треба да се решат.

Трамп нагласи дека преговарачите веќе ги идентификувале клучните прашања што ќе бидат на маса.

„Ќе разговараме за територија. Многу се сменија од пред војната. Исто така, ќе зборуваме за електрани – тоа е едно од големите прашања“, им рече Трамп на новинарите

Според извори блиски до преговорите, Трамп ја разгледува и можноста да го признае Крим како руска територија како дел од поширокиот мировен договор. Овој потег, доколку се спроведе, би можел значително да влијае на идните односи меѓу Киев и Западот.

Сепак, украинскиот претседател Володимир Зеленски категорично отфрла какви било територијални отстапки и инсистира на тоа дека Русија мора да се повлече од окупираните територии. Американските власти, од друга страна, сметаат дека Украина нема да може да ги врати сите изгубени територии и дека компромисот ќе биде неизбежен.

Пријателскиот тон на Трамп кон Путин и подготвеноста да разговара за отстапки предизвикаа загриженост кај американските сојузници во НАТО. Многу европски земји сега ја доведуваат во прашање веродостојноста на американските безбедносни гаранции, кои беа темел на стабилноста на континентот со децении.

Иако Трамп инсистира дека мирот е поблиску од кога било, американската администрација не ја исклучува можноста за нови санкции против Русија доколку денешните разговори не ги дадат посакуваните резултати.