Американскиот претседател Доналд Трамп во вторникот изјави дека САД би можеле да ја завршат својата воена кампања против Иран во рок од две до три недели, објави „Ројтерс“.

— Ќе си заминеме многу бргу — им рече тој на новинарите во Овалната соба во Белата куќа, додавајќи дека повлекувањето може да се случи „во рок од две недели, можеби две недели, можеби три“.

Оваа изјава е досега најјасниот сигнал од Трамп дека има намера наскоро да стави крај на едномесечната војна, која го преобликува Блискиот Исток, ги наруши глобалните енергетски пазари и ја смени насоката на претседателскиот мандат на републиканецот.

Трамп додаде дека Техеран не мора да постигне договор со Вашингтон за конфликтот да заврши.

— Иран не мора да постигне договор, не. Не, не мора да склучат договор со мене — рече тој, прашан дали успешната дипломатија е предуслов САД да го намалат конфликтот.

Наместо тоа, според Трамп, условот за прекин на операцијата е Иран да биде „вратен во камено доба“, односно да нема можност наскоро да набави нуклеарно оружје.

— Тогаш ќе си заминеме — рече тој.

Конфликтот почна на 28 февруари, со заеднички американско-израелски напади врз Иран, по што Техеран возврати со удари врз Израел и цели во регионот поврзани со САД. Војната сега е во петтата недела, а паралелно со нападите се засилуваат и дипломатските сигнали за можен крај на операциите.

Хегсет: Промената на режимот во Иран е веќе постигната, наредните денови се клучни