Американскиот претседател Доналд Трамп во интервју за „Фајненшл тајмс“ изјави дека ја разгледува можноста за „запленување“ на иранската нафта, нагласувајќи дека ја смета оваа опција за најпосакувана.

-Искрено, мојата омилена опција е да ја земам иранската нафта, но некои глупави луѓе во Соединетите Држави велат: „Зошто го правите ова?“ Тие се глупави луѓе – рече Трамп.

Тој, исто така, не ја исклучи можноста за запленување на островот Харг, клучен ирански центар за извоз на нафта во северниот дел на Персискиот Залив. Според него, Исламската Република нема доволно капацитет да ја брани областа, а Соединетите Држави би можеле „многу лесно“ да ја преземат контролата.

Трамп додаде дека американските сили веќе „бомбардирале 13.000 цели“ за време на операциите на Блискиот Исток, истакнувајќи дека остануваат околу 3.000 цели.

Зборувајќи за динамиката на конфликтот, тој оцени дека САД се неколку недели пред предвиденото во однос на плановите во врска со Иран, тврдејќи дека американските сили ја уништиле иранската морнарица, воздухопловните сили и значаен дел од неговите ракетни капацитети.