Американскиот претседател Доналд Трамп во четвртокот повика шестмина демократи да бидат уапсени и изведени на суд откако тие објавија видео во кое ги охрабруваат припадниците на американската војска и разузнавачката заедница да одбијат да ги следат наредбите доколку тие се незаконски, објави „Политико“.

„Тоа се нарекува бунтовничко однесување на највисоко ниво. Секој од овие предавници на нашата земја треба да биде уапсен и изведен на суд. Нивните зборови не смеат да останат без последици – нема да имаме држава повеќе. Мора да се постави пример,“ обвини Трамп во објава на неговата платформа „Трут сошал“.

Потоа претседателот повторно сподели 16 објави, вклучително и една која повикува демократите да бидат обесени, „како што би направил Џорџ Вашингтон“.

„Бунтовничко однесување, казниво со смрт!“ напиша тој подоцна.

Сенаторите Елиса Слоткин (демократ од Мичиген) и Марк Кели (демократ од Аризона), како и конгресмените Џејсон Кроу (Колорадо), Криси Хулахан (Пенсилванија), Меги Гудландер (Њу Хемпшир) и Крис Делузио (Пенсилванија), се појавија во видеото објавено во вторникот. Тие сите се или воени ветерани или работеле во безбедносни служби пред да влезат во политиката.

„Знаеме дека сте под огромен стрес и притисок во овој момент. Американците ѝ веруваат на својата војска. Но, тој кредибилитет е загрозен. Оваа администрација ги спротивставува униформираните војници и разузнавачките професионалци на американските граѓани. Како и ние, и вие се заколнивте да го штитите и браните Уставот. Заканите по нашиот Устав не доаѓаат само однадвор, туку и однатре. Нашите закони се јасни — можете да одбиете незаконски наредби,“ изјавија тие.

Тенеси го стопираше распоредувањето на Националната гарда во Мемфис

Како дел од најавената акција за справување со уличниот криминал и засилување на депортациите, Трамп ја федерализираше Националната гарда во неколку американски градови, меѓу кои Вашингтон, Чикаго и Портланд. Демократските функционери тврдат дека распоредувањата претставуваат незаконски федерален прекршок и поднесоа тужби за да ги запрат.

Ниеден од демократите во видеото веднаш не одговори на барањата за коментар во врска со заканите на Трамп. Но, Трамп продолжи да реагира гневно и во четвртокот.

„Ова е навистина лошо и опасно за нашата земја. Нивните зборови не смеат да останат без реакција. Седициозно однесување од предавници… да ги затвориме?“ напиша тој подоцна.

Повлечени дел од војниците на Националната гарда кои беа распоредени во Чикаго и Портланд