
Не знам како не им беше срам тоа да го напишат, вели Тошковски за соопштението на Судот за снимката со Мијалков
Министерот за внатрешни работи Панче Тошковски вечерва во гостување на ТВ21 рече дека му било срам кога го прочитал соопштението на Судот по објавената снимка на која се гледа ексдиректорот на УБК, Сашо Мијалков, како излегува од луксузен автомобил „Ферари“ во Монте Карло.
Препорачано
„По донесено решение од страна на судија, надлежното известување го доставиле до надлежното министерство, па сега кого замајуваат сега, македонскиот народ, македонските граѓани, кого го замајуваат? Решение за условен отпуст и решение за враќање пасош се знае кој носи, не носи ниту Обвинителство, нити МВР, ниту Министерство за култура, ниту вие како новинар. Јас не знам како не му беше срам на тој што го напишал тоа соопштение… да напише, нормално, да, донесено е решение за враќање, да, пасошот е доставен до МВР за да му биде вратен на предметното лице“, вели Тошковски.
Министерот Тошковски најави и дека ќе се кратат работните места во Министерството за внатрешна работа.
Како што рече, во министерството „има повеќе функционерски позиции отколку работници“.
„Сега концептот на гранична полиција е поделен на четири дела, имаме регионален центар север, југ, исток, запад, сите овие имаат началник. Началникот има помошник, секретарка, шофер, има советници, има општи и заеднички служби, има сметководителски служби, како да кажам сега наместо да има еден… А па сите овие 4 над нив имаат уште еден кој што врши контролно-надзорна улога, значи функции, функции, функции“, вели Тошковски.