Тетово е „најпознатиот илиро-албански град на светот“, рече писателот Кадаре откако го прогласија за почесен граѓанин
Во Тетово денеска, на свечена академија, најпознатиот албански писател, Исмаил Кадаре, беше прогласен за почесен граѓанин на градот, а признанието му го додели општината, чијшто совет донесе таква одлука на една од последните седници.
Во своето обраќање, 86-годишниот писател, го нарече Тетово „најпознатиот илиро-албански град на светот“, веројатно во обид со таквиот изблик на шовинизам да им поласка на домаќините кои му укажале чест.
„Досега сум добил многу признанија, но ова признание е многу посебно бидејќи го добивам од Тетово, најпознатиот илиро-албански град на светот. Ме радува што слушам убави зборови од читателите на Тетово, а сега имам можност да се сретнам со нив. Првпат доаѓам во Тетово, но писателот секогаш го чувствува тоа во душата и во своите дела. Верувам дека и понатаму ние ќе комуницираме преку моите дела и преку вашите зборови. Им се заблагодарувам на граѓаните на Тетово кои дојдоа овде лично да се сретнат со мене“, рече Кадаре, обраќајќи им се на присутните на свеченоста.
Кадаре, кој со децении живее во Париз, е член на Француската академија, а во кариерата како писател, поет, романсиер и драматург, има добиено низа големи светски награди.
Пред Исмаил Кадаре, локалната власт на градоначалникот Биљал Касами и Беса, за почесен граѓанин го прогласи Рифат Јашари, брат на загинатиот командант на косовската ОВК Адем Јашари. За таа одлука не гласаше Советот (кој тогаш сѐ уште не беше конституиран), туку ја донесе лично градоначалникот Касами и денот го нарече „празник за Тетово“. Одлуката за Кадаре беше едногласно усвоена, но советниците-Македонци забележаа дека вакви признанија им се даваат само на Албанци и дека Тетово има заслужни граѓани од македонска националност, кои исто така заслужуваат да бидат прогласени за почесни граѓани.