Танц-фест 2021: Чекор понатаму за современиот танц
Заврши 17. издание на фестивалот за современ танц „Танц-фест“, кое од 1 до 7 јуни се одржа во Домот на армијата и донесе експлозија на емоции, енергија и убавина.
Фестивалот за современ танц „Танц-фест“ не само што успеа да ги надмине сите препреки што ги наметна пандемијата на коронавирусот, туку со годинашното издание оди чекор понатаму со промовирањето на својот нов дом и со фантастичната енергија со која беа изведени десет извонредни кореографии, потпишани од домашни, но и интернационални кореографи, а беа прикажани и два танцови филма.
Во рамките на фестивалот, публиката имаше можност да ужива во претставите на македонските кореографи Адријана Данчевска – „Не ми ги допирај очите“ и „Погрешно“, Дејан Битровски – „Ѓаволска дупка“, „Најлон“ на Валентино Апостоловски и Благој Мицевски. Една деценија успешна работа и современ танц, кој стои рамо до рамо со оние од светски ранг, одбележа Скопје танцовиот театар со претставата „Меѓусвет“.
Живописната приказна која „Меѓусвет“ ја раскажува е инспирирана од вонвременската поезија на Блаже Конески и песната „Убавите жени“, а во фокусот ја става жената, нејзината улога во општеството и пренесува порака за битисувањето во патријархатот. Зад кореографијата и режијата на „Меѓусвет“ се потпишува Рисима Рисимкин, музиката ја компонираше Тони Китановски, костимите се на Благој Мицевски, а дизајнот на сцена е на Матеа Мијановиќ.
Од интернационалните гости, танчарот Жиган Крајнчан од Љубљана, Словенија, се претстави со „Fusion with Myself“ во продукција на „Exodos“, „Загребачки плесни ансамбл“ ја одигра претставата „Revel Revel“, а во соработка со „Театроскоп“, Францускиот Институт и Француската Алијанса Тетово, францускиот кореограф и танчар, Амала Дианор, се претстави со својата соло танцова претстава „Man Rec“ во Домот на култура во Тетово, но и пред скопската публика во Домот на АРСМ.
Публиката можеше премиерно да ги види и танцовиот филм „Витро“ на младиот Филип Петровски и „Дома“ на кореографката Адријана Данчевска. Во рамките на фестивалот, студентите од Универзитетот „Гоце Делчев“ – Штип, Исидора Краљевска, Борис Богдановски, Ивана Балабанова ја одиграа својата дипломска претстава „Јас сум, тука сум“, а заедно со Викторија Коцева и Антонија Димитревска танцуваа во „Погрешно“ на Данчевска.
Традиционално, на „Танц-фест 2021“ од стручниот совет во состав Љупчо Јолевски, Биљана Илиќ Героска и Билјана Нестороска беа доделени престижните награди „Менада“. Наградата „Менада за млад уметник“ оваа година ѝ припадна на Матеа Киселичка, кореографка што во моментов работи и твори во Кина, а „Менада за врвни достигнувања во областа на танцот“ ѝ беше доделена на американската кореографка и уметница Каролин Карлсон, која најави дека следната година ќе дојде во Скопје. Фестивалот му оддаде почит и на легендата на македонскиот балет, Антон Тони Баталаков.
(Текстот е објавен во „Културен печат“ број 84, во печатеното издание на „Слободен печат“ на 12-13 јуни 2021)