Новото судење за случајот „Таргет-тврдина“, не започна денеска, како што беше најавено, поради отсуство на еден од обвинетите, и ќе започне утре за кога се најавени сведочења на „свиркачите“ Ѕвонко Костовски и Ѓорѓи Лазаревски, по чија иницијатива и беше обелоденет скандалот со масовното прислушување во кој првообвинетиот е поранешниот директор на Управата за безбедност и контраразузнавање Сашо Мијалков.

Инаку, според објаснувањето на судијата Илија Трпков, кој откако го утврди присуството на другите обвинети меѓу кои, освен Мијалков, е и ексминистерката за внатрешни работи Гордана Јанкулоска, даде пет минути пауза за да се консултира што се случува со спроводот на обвинетиот Тони Јакимовски од Охрид каде што издржува мерка куќен притвор за случајот „Спец-каса“. По утврдениот пропуст од страна на Судот, судијата констатира дека не се исполнети условите за одржување на главната расправа и соопшти дека судењето ќе почне утре.

А по неговата најава за утрешните сведоци, одбраната на дел од обвинетите побараа прво да се изведат материјални докази, а потоа да се испрашуваат сведоци.

Судењето за случајот „Таргет-Тврдина“ се врати од почеток откако во декември Апелацискиот суд Скопје соопшти дека ја укинува првостепената пресуда, со која поранешниот директор на Управата за безбедноста контраразузнавање Сашо Мијалков беше осуден на 12 години затворска казна.