Во рамките на серијата настани насловени како „Скопско асеизмичко лето“ кои се посветени на одбележување на 60-годишнината од скопскиот земјотрес, Градежниот факултет, АДИНГ АД Скопје и средното градежно училиште „Здравко Цветковски” го организираат настанот БЕТОН.Ск.

Главна цел на овој настан, посветен на производството на бетон како најмногу употребуван и истовремено најчувствителен на импровизации конструктивен материјал, што ќе се одржи во дворот на фабриката АДИНГ во понеделник со почеток од 11.30 часот, е подигнување на јавната свест за потребата, значењето и улогата на квалитетно домашно градежништво, а со тоа и на отпорните градби кои се единствен одбранбен механизам од дејството на земјотресите и другите природни хазарди.

 Истовремено, со него сакаме да ја потенцираме важноста од доследно почитување на стандардите и пропишаните постапки за изработка на квалитетни градежни материјали, без што се навлегува во зона на ризични авантури со несогледиви последици – информира деканот на Градежен факултет, проф. д-р Горан Марковски.

На настанот пет групи составени од по два студенти од Градежниот факултет и еден ученик од средното училиште Здравко Цветковски ќе треба да приготват бетон со одреден квалитет и да го вградат во контролни пробни тела. Јакоста на притисок на изработениот бетон ќе се испита на 26 јули во 5:17 часот.

Со ова симболично ќе се одбележи 60-годишнината од земјотресот чии катастрофални последици најмногу се должат на лошиот квалитет на тогашните градби. Истовремено, како што вели професорот, настанот треба да послужи и за зголемување на видливоста на градежништвото, како дејност од суштествено значење за нормално функционирање и развој на државата.